Patang puluh wolu taun kapungkur, madêg pawiyatan kang aran SMK SAKTI ing Gêmolong Sragen. SMK kang dumadi saka yayasan SAKTI iki kalêbu salah sawijining pawiyatan kang moncèr ana ing wilayah Sragen. Pawiyatan kang wus terakreditasi A iki, diakui lan antuk sèrtifikasi ISO 9001:2008 kanthi nomer 01 100 075170 saka PT. TUV. Kajaba kuwi, pawiyatan SAKTI duwèni lahan kang ambane 19.020 m2. Kalêbu fasilitase, ora kurang anggone nglêngkapi kanggo pasinaon para siswa. Kanthi fasilitas kang di duwèni, para siswa anggone nyêcêp kawruh saya ayêm lan bisa trampil amarga akèh laboraturium lan bengkel kanggo ngudi kaprigêlane ing babagan praktèk.
Jumbuh karo jênênge, SMK SAKTI duwèni program jurusan kang cacahe ana papat ing antarane ya kuwi Tèknik Kendaraan Ringan, Tèknik Konstruksi Bangunan, Tèknik Mesin Perkakas, lan Tèknik Komunikasi Jaringan. Sak kabèhe kompetensi mau ing pangajab bisoa murakabi lan migunani ing madyaning masarakat. Mula pawiyatan iki manfaatke kêtrampilan ing babagan tèknologi kanggo turut mbangun nêgara lan bangsa.
SAKTI wiwit taun 1974 wus akèh kang owah kususe ing bab kêmajuan fasilitase. Wiwit saka cacahe ruang kanggo pasinaon, laboratorium lan uga bengkèl kanggo praktèk. Babagan pêrkêmbangan ora luput saka masarakate. Masarakat kang saperangan pêtani, duwe dampak gêdhê kanggo mbêntuk krèatifitase siswa. Kêtrampilan kang wus cinêcêp ana ing pawiyatan bisa dikêmbangake siswa kanggo nggawe sistêm anyar kang pungkasane migunani tumraping liyan. Siswa kudu bisa nuwuhake kreatifitas, saengga sistême bisa dadi karya tepat guna. Tuladhane, sak wise traktor kang nggampangake anggone nggaru, uga bisa nggawe alat kanggo nggampangke among tani olèhe tandur utawa alat kanggo ngocori tanduran.
Tuladha liyane yaiku kalêbu nêmokake sistêm sensor kang bisa nglacak kêndaraan motor sing ilang. Utawa bisa ngêcek mêsin kang mati tuladhane busi, aki lan kabêl sajroning lampu. Tèknik Ketrampilan Jaringan uga bisa nêmokake sistêm anyar kanggo nggampangake panggaweane manungsa kayata nggawe aplikasi ojek motor, bus, angkot, becak lan sak panunggalane. Kêtrampilan utawa sistêm anyar kang wus di têmokake, ora liya kajaba kanggo kêmajuane pawiyatan SAKTI uga kanggo ndèndèr kabisane para siswa ngiras pantês pêngêmbangan tèknologi tepat guna kususe ana wilayah Sragen.
Kreatif Lajêring Pangurip-urip
pawiyatan SAKTI wus kawêntar ana ing babagan program kêjuruane. Kang wus dadi daya linuwih tumrape masarakat anggone nyêkolahake putra lan putrine dimèn sabubare nyêcêp kawruh ana ing SMK SAKTI bisa antuk pêdamêlan. Wus Jumbuh karo asmane SAKTI. Apa ta wêrdine SAKTI? SAKTI pada karo sekti yaiku mêngku têgês; duwe daya linuwih. Gêgayutan kang kaya mangkana mula wus trêp lan pantês yen ta kaluwarga ana ing pawiyatan SAKTI duwèni daya kang linuwih ing bab kêdisiplinane.
Sêktine pawiyatan iki salah sijine amarga jiwa kreatif saka kabèh kaluwarga SMK SAKTI. Siswa kang ngangsu kawruh ana ing SAKTI wus sak mêsthine nampa piwulangan dhasar kang diwulangake marang dwijane manut program kêjuruane dhêwê-dhêwê. Ilmu-ilmu dhasaran mau wis mêsthine kudu dikêmbangke supaya dadi karya-karya tèknologi kang bisa migunani tumrap bêbrayan. Mula kasêbut SMK têgêse pamulangan kang nggulawênthah calon miji-miji trampil iki, ora mung wajib ngluluske siswa ning uga kudu bisa nyangoni mentalitas kreatif karo para siswasiswane. Sabab pawiyatan SMK iku bakal nglairake pirang-pirang miji ing babagan tèknologi. Kanggo para siswa prayogane ora mung nyêcêp kawruh dhasar kang diwulangake saka dwija, ananging kêpiye carane saka kawruh dhasar kang di tampa bisa dikêmbangake manèh. Mula kudu nggêdhèkake karêp lan têkun anggone sinau. Paribasane nggajah êlar, sarwa gêdhe lan santosa kêkarêpane. Mula kabeh mau bisa kasêmbadan mênawa para warga SAKTI duwèni jiwa kreatif. Jiwa kreatif ya kuwi duwèni rasa kêpengin ngêrti lan gêlêm takon, duwèni kapribadèn kang luwês gêlêm nampa babagan anyar, wani mêtu saka ayêming rasa lan duwèni grêgêt anggone nyambut gawe.
Kêmajuane pawiyatan iku gumantung ana sakabèhe para warga SMK SAKTI. Mbangun kreatifitas iki pancèn ora gampang. Mbutuhake sarana lan tekat kêncêng saka warga pawiyatan uga. Sarana kanggo mbangun kreatifitas kudu sinêngkuyung dening panêntu kabijakan sêkolah lan yayasan, siswa uga dwija. Kabèh mêsthi gêlêm gumrêgêt kêncêng nuwuhke jiwa kreatif.
Maneka warna cara kanggo nuwuhke jiwa kreatif iki, upamane lumantar kompetisi lomba cipta tèknologi. Kang dadi punjêre ya para siswa dhêwe, mula lomba dianakake antar program jurusan sabên purna ujian sêmèstêran. Siswa kang njajal golèk ide lan mbabar pêngêmbangan tèknologi têrapan, ora kèri dwija-dwija uga kudu siap minangka suhe. Suh têgêse kang gêlêm nyêngkuyung lan ngarahake karêp idene siswa. Cêkake para dwija gêlêm dadi tuk sumbêre parang pitakonane para siswa kang mèlu lomba mau.
Iku mau amung tuladha cilik, ananging sing dadi bakune mbangun jiwa kreatif bisa kalaksanan yen ta panêntu kabijakan sêkolah, dwija lan siswa pada guyub rukun, gotong royong bêbarêngan. Mula anane guyub rukun lan gotong royong ndandèkake lajêring panguripan ana ing SMK SAKTI kang saya suwe bakal kuncara sak solo raya, luwih-luwih sak indênging bawana.
